மழைக்காலத்தில் "மெட்ராஸ் ஐ": அறிகுறிகள், பரவாமல் தடுப்பது எப்படி?

மெட்ராஸ் ஐ: மழைக்காலத்தின் "வீட்டு விருந்தாளி"

காலையில் எழுந்ததும் கண் சிவந்திருக்கிறதா? கண் இமைகள் ஒட்டிக்கொண்டு திறக்க முடியவில்லையா? அடுத்த நாளே வீட்டில் இன்னொருவருக்கும் அதே பிரச்சனை வந்துவிட்டதா?

அந்த "விருந்தாளி" தான் மெட்ராஸ் ஐ. மருத்துவ மொழியில் இதை conjunctivitis அல்லது "pink eye" என்று சொல்வார்கள். வடகிழக்கு பருவமழை காலத்தில், ஈரப்பதமும் கூட்டமும் அதிகமாக இருப்பதால், இந்த கண் நோய் வேகமாகப் பரவுகிறது.

பயப்பட வேண்டாம். பெரும்பாலும் இது 1–2 வாரத்தில் குணமாகிவிடும். ஆனால் சரியான கவனிப்பு இல்லாவிட்டால் குடும்பம் முழுவதும் பரவிவிடும். இந்த blog-ல் மெட்ராஸ் ஐ அறிகுறிகள், சிகிச்சை, பரவாமல் தடுக்கும் வழிகளை எளிய தமிழில் பார்க்கலாம்.

மெட்ராஸ் ஐ என்றால் என்ன?

கண்ணின் வெள்ளைப் பகுதியையும், இமைகளின் உட்புறத்தையும் மூடியிருக்கும் மெல்லிய சவ்வுக்கு conjunctiva என்று பெயர். இந்த சவ்வுவில் ஏற்படும் அழற்சிதான் மெட்ராஸ் ஐ.

பெரும்பாலும் இதற்கு காரணம் வைரஸ் தொற்று (adenovirus). சில நேரங்களில் பாக்டீரியா அல்லது அலர்ஜியாலும் வரலாம். பல ஆண்டுகளுக்கு முன் சென்னையில் (மெட்ராஸ்) பெரிய அளவில் பரவியதால் தான் இந்தப் பெயர் வந்தது என்று சொல்லப்படுகிறது.

மெட்ராஸ் ஐ அறிகுறிகள்

இந்த அறிகுறிகளில் ஏதாவது இருந்தால் கவனமாக இருங்கள்:

• கண் சிவப்பாகுதல் (ஒரு கண்ணில் தொடங்கி, மற்ற கண்ணுக்கும் பரவலாம்)
• கண்ணில் நீர் வடிதல்
• கண் அரிப்பு, எரிச்சல்
• கண்ணில் மணல் இருப்பது போன்ற உணர்வு
• காலையில் இமைகள் ஒட்டிக்கொள்ளும் அளவுக்கு பீளை (discharge)
• இமை வீக்கம்
• வெளிச்சத்தைப் பார்க்க கஷ்டம்

மெட்ராஸ் ஐ எப்படி பரவுகிறது?

மெட்ராஸ் ஐ பாதிக்கப்பட்டவரைப் பார்த்தாலே வரும் என்று பலர் நினைக்கிறார்கள். இது தவறான நம்பிக்கை. பார்ப்பதனால் அல்ல, தொடுவதனால்தான் பரவுகிறது:

• பாதிக்கப்பட்டவர் கண்ணைத் தொட்டு, பிறகு கதவு கைப்பிடி, மொபைல், ரிமோட் போன்றவற்றைத் தொடும்போது
• டவல், தலையணை, கைக்குட்டையை பகிர்ந்து கொள்வதால்
• கண் மை, காஜல், கண் மருந்து பாட்டிலை பகிர்வதால்
• பள்ளி, அலுவலகம், பேருந்து போன்ற கூட்டமான இடங்களில் நெருக்கமான தொடர்பால்

மழைக்காலத்தில் எல்லோரும் வீட்டில் அல்லது மூடிய இடங்களில் அதிக நேரம் இருப்பதால் தான் இந்த நோய் வேகமாகப் பரவுகிறது.

மெட்ராஸ் ஐ சிகிச்சை: என்ன செய்ய வேண்டும்?

வைரஸ் மெட்ராஸ் ஐ பெரும்பாலும் தானாகவே குணமாகும். ஆனால் கண் மருத்துவரைப் பார்ப்பது முக்கியம். ஏனெனில் சில நேரங்களில் இது கருவிழியை (cornea) பாதிக்கலாம்.

• மருத்துவர் பரிந்துரைத்த கண் சொட்டு மருந்துகளை மட்டும் பயன்படுத்துங்கள்
• சுத்தமான தண்ணீரில் நனைத்த துணியால் கண்ணை மெதுவாக துடைக்கலாம்
• குளிர்ந்த தொடுகை (cold compress) எரிச்சலைக் குறைக்கும்
• நன்றாக ஓய்வு எடுங்கள், தண்ணீர் அதிகம் குடியுங்கள்
• கான்டாக்ட் லென்ஸ் பயன்படுத்துபவர்கள், கண் முழுவதும் சரியாகும் வரை அதை தவிர்க்கவும்

மெட்ராஸ் ஐ-க்கு செய்யக்கூடாதவை:

• மருந்தகத்தில் நேரடியாக மெட்ராஸ் ஐ மருந்து வாங்கி போடாதீர்கள். சில சொட்டு மருந்துகளில் இருக்கும் ஸ்டீராய்டு (steroid) கண் அழுத்தம், கண்புரை போன்ற பாதிப்புகளை ஏற்படுத்தலாம்.
• தாய்ப்பால், வெண்ணெய், மூலிகை சாறு போன்ற வீட்டு வைத்தியங்களை கண்ணில் விடாதீர்கள். இவை தொற்றை அதிகரிக்கச் செய்யலாம்.
• கண்ணை தேய்க்காதீர்கள்.

வீட்டில் மெட்ராஸ் ஐ பரவாமல் தடுக்க 7 வழிகள்

• அடிக்கடி சோப்பு போட்டு கை கழுவுங்கள். கண்ணுக்கு மருந்து போடும் முன்னும் பின்னும் கை கழுவுவது மிக முக்கியம்.
• தனி டவல், தலையணை பயன்படுத்துங்கள். அவற்றை தினமும் தோய்த்து, வெயிலில் காய வையுங்கள்.
• கண்ணை தொடுவதை தவிருங்கள். துடைக்க டிஷ்ஷூ பயன்படுத்தி, உடனே குப்பைத் தொட்டியில் போடுங்கள்.
• கண் மருந்தை பகிராதீர்கள். ஒவ்வொருவருக்கும் தனி பாட்டில்.
• கண் மை, காஜல் பயன்படுத்தாதீர்கள். ஏற்கனவே பயன்படுத்தியதை தூக்கிப் போடுங்கள்.
• வீட்டில் ஓய்வு எடுங்கள். அறிகுறிகள் குறையும் வரை பள்ளி, அலுவலகம் செல்லாமல் இருப்பது மற்றவர்களை பாதுகாக்கும்.
• மொபைல், கதவு கைப்பிடி, ரிமோட் ஆகியவற்றை அடிக்கடி துடையுங்கள்.

உடனே கண் மருத்துவரைப் பார்க்க வேண்டிய அறிகுறிகள்

• கடுமையான கண் வலி
• பார்வை மங்குவது அல்லது குறைவது
• வெளிச்சத்தைப் பார்க்க முடியாத அளவு கஷ்டம்
• கட்டியான பச்சை/மஞ்சள் பீளை
• குழந்தைகள், முதியவர்கள், சமீபத்தில் கண் அறுவை சிகிச்சை செய்தவர்கள்
• 1–2 வாரத்தில் குணமாகாவிட்டால்

அடிக்கடி கேட்கப்படும் கேள்விகள் (FAQs)

1. மெட்ராஸ் ஐ எதனை நாட்களில் குணமாகும்? பெரும்பாலும் 1 முதல் 2 வாரங்களில் குணமாகிவிடும்.

2. மெட்ராஸ் ஐ பார்த்தாலே பரவுமா? இல்லை. பாதிக்கப்பட்டவரின் கண்ணீர் பட்ட பொருட்களைத் தொட்டு, அந்த கையால் கண்ணைத் தொடும்போதுதான் பரவுகிறது.

3. மெட்ராஸ் ஐ-க்கு சிறந்த மருந்து எது? காரணத்தைப் பொறுத்து மருந்து மாறும். கண் மருத்துவர் பரிசோதித்து பரிந்துரைக்கும் மருந்தை மட்டும் பயன்படுத்துங்கள்.

4. மெட்ராஸ் ஐ இருக்கும்போது குழந்தைகளை பள்ளிக்கு அனுப்பலாமா? அறிகுறிகள் குறையும் வரை, மருத்துவர் சொல்லும் வரை வீட்டில் வைத்திருப்பது நல்லது.

5. கறுப்பு கண்ணாடி அணிந்தால் பரவாதா? கண்ணாடி வெளிச்ச எரிச்சலை குறைக்கும், கண்ணை தொடுவதையும் குறைக்கும். ஆனால் கை கழுவுவதுதான் முக்கியமான தடுப்பு வழி.

மெட்ராஸ் ஐ சிகிச்சைக்கு தி ஃபவுண்டேஷன்-ஐ தொடர்பு கொள்ளுங்கள்

கண் சிவப்பு, வலி அல்லது அரிப்பு இருந்தால் தாமதிக்க வேண்டாம். சென்னை, கோயம்புத்தூர், மதுரை உட்பட தமிழ்நாடு முழுவதும் உள்ள தி ஃபவுண்டேஷன். கண் மருத்துவமனைகளில் எங்கள் கண் மருத்துவர்கள் உங்களுக்கு சரியான சிகிச்சை அளிப்பார்கள்.